PROGRAM POLITIC MF 2013 » Moviment Friûl

IN 10 PONTS

Primis indicazions

01. A CUÂI FURLANS?
Il Mf al clame a sostignîlu ducj i furlans e viers di lôr al indrece la sô azion.

Pal Mf, furlan al è cui che, cence cjalâ se lis sôs lidrîs a son chenti o se al ven di inaltrò, al rispiete e al ame cheste tiere, al fevele o al impare a fevelâ la sô lenghe e si bat pai dirits dal Friûl (Fausto Schiavi, president dal Mf, 1968).

02. LIS DÔS DIGNITÂTS
Chel dal Mf al è un program politic che si fonde su dôs dignitâts, la dignitât identitarie e la dignitât dal lavôr. La dignitât identitarie si realize tal ûs plen de lenghe, chê dal lavôr tal dirit al lavôr e tai dirits dai lavoradôrs.

03. LA CUISTION IDENTITARIE. UNE UNITÂT STORICHE DI CUATRI NAZIONALITÂTS
Il Friûl al è une unitât storiche di cuatri identitâts nazionâls, la furlane, la slovene, la todescje e la taliane venite, che lis primis trê la Republiche taliane lis individue tant che minorancis linguistichis pal art. 6 de Costituzion, e dai teritoris de Cjargne e Valcjanâl, dal Friûl orientâl, dal Friûl ocidentâl e Puart e dal Friûl centrâl.
La autonomie, che e jere e e je l’obietîf storic e politic gjenerâl dal Mf, te sô espression istituzionâl e teritoriâl, te sôs finalitâts sociâls, culturâls, linguistichis e economichis e à di vê un fondament identitari nazionalitari ta chê unitât.

04a. LA CUISTION ISTITUZIONÂL DI BASE. LA AUTONOMIE DE REGJON FRIÛL.
La cuistion istituzionâl di fonde e derive di chê identitarie. Li che e je une identitât nazionâl, li e à di sei une autodeterminazion. Al Friûl i covente une istituzion autonome sô, la Regjon Friûl, stât inte unitât di un sisteme federatîf di stâts regjonâi talians e europeans, cence teritoris estranis ae sô identitât teritoriâl storiche.

La cussience di apartignince identitarie di un popul lu met te cundizion plui favorevule par decidi di se, dal so teritori e des sôs bisugnis, e se di consecuence al dispon di une istituzion politiche sô, indipendente o federade cun altris istituzions analighis.

Doi elements a àn impedît e metude in dificoltât la cussience di apartignince identitarie dal popul furlan, e une politiche par mantignî la sô unitât istituzionâl: l’inseriment inte Regjon dal teritori no furlan di Triest, cun dute la sô cjarie di nazionalisim talian vitimistic, rivendicatîf e egocentric, e cu lis sôs pretesis compensadoriis ancje a spesis di dute la regjon, e la presince di istituzions provinciâls dal Friûl orientâl e dal Friûl ocidentâl che si si son oponudis a Udin, te logjiche di une bisugne diferenzialiste des lôr classis politichis locâls viers la part plui bocone dal teritori; i politics gurizans e pordenonês in cariere a pensavin che ur covignìs di dimostrâ ae lôr circoscrizion eletorâl a dimension provinciâl di volê batisi pai interès dal lôr teritori di elezion, e chest al deventave e al devente miôr se si cjate o si invente une distinzion, un oposizion. Cussì che ancje tes espressions il Friûl si ridûs ae Provincie di Udin, e il Friûl orientâl e il Friûl ocidentâl a deventin tal ordin ‘l’Isontino’ e ‘il Pordenonese’ o ‘Destra Tagliamento’.

04b. LIS SOLUZIONS DI MIEÇ
Ogni soluzion che e va te direzion de Regjon Friûl e dal rinfuarciment de unitât storiche dal Friûl e je acetade dal Mf, tune logjiche di gradualitât, scomençant de minime, che e je la semplice abolizion simultanie des provinciis, e passant pe articolazion interne de regjon atuâl in dôs subaministrazions distintis e autonomis, Friûl e Triest.

05. LA CUISTION DAL LAVÔR …
Il Moviment Friûl al met il lavôr tal centri de economie e dai rapuarts economics: 1.la dignitât dal lavoradôr e dal so lavôr, 2.il lavôr e la economie che a rispietin il teritori storic e la salût; 3.il lavôr che al manten e al ricostituìs la muse demografie dai paîs parie cu la lôr ricostruzion ambientâl comprometude dal abandon dai ultins 30 agns.

06. …DE POLITICHE ECONOMICHE E DE POLITICHE DI ASSISTENCE
Il Moviment Friûl al refude sei la filosofie e la pratiche liberistiche, forme degjenerade dal liberalisim economic, di considerâ i rapuarts economics e dal marcjât dal lavôr come se si ves di tornâ ae albe de storie industriâl e dal Votcent, sei ogni pratiche assistenzialistiche che no incentive la ricercje dal lavôr produtîf, e favorìs la passivitât e e cres la spese publiche. La figure dal assistût e à di sei ben definide te sô dificoltât sociâl grave, e la azion di assistence publiche ben delimitade e indreçade.
Il Moviment Friûl al vûl che si favorissi in ogni maniere la solidarietât sociâl e lis cundizions che le judin.
Il Moviment Friûl al vûl che si favorissi il cumierç a chilometri zero e che si fermi e si ridusi la politiche dai centris comerciâi che a àn copât il cumierç minût dai paîs.

07. LA CUISTION DAL TERITORI STORIC
Il Moviment Friûl al considere tant che une involuzion de civiltât umane lis alterazions dal teritori e dai paîs e des citâts storichis: cimentificazion di areis verdis, edilizie civîl e industriâl modulâr e funzionalistiche, che no seguìs une regule estetiche di armonie cu la tipologjie costrutuive storiche, difondude a slas sul teritori, viertidure e moltiplicazion di stradis e autostradis a rêts simpri plui strentis. Ogni sfuarç al va fat par fermâ cheste logjiche degjenerative dal sfrutament dal teritori e, li che al è pussibil, par bonificâlu.

08. LA CUISTION DE CULTURE
La culture che il Moviment Friûl al intint di promovi in Friûl e à di sei avanzade, universâl e identitarie intune: 1.avanzade, par che lis competencis dai furlans no sedin secondis in Europe e tal Mont e par promovi lis tantis competencis za presentis chenti; 2.universâl, par che no plati nissune sieradure provincialistiche che e gjenere pôris e prejudizis e che ogni persone dal mont e puedi in chê ricognossisi; 3.identitarie, par che e feveli simpri ancje par furlan e/o tes lenghis storichis di minorance.

Il Moviment Friûl, che al à concepide e fondade la politiche linguistiche de lenghe furlane fint dai agns 70, al sostegn lis liniis programatichis che a son stadis definidis dal Osservatori de lenghe e de culture furlanis tai agns 90 e, par chel che al rivuarde la scuele, chês de propueste di leç de Comission pai obietîfs didatics de Agjenzie regjonâl pe lenghe furlane dal an 2007.

09. LA CUISTION DE EDUCAZION E DE FORMAZION, SCUELE E UNIVERSITÂT
Il Moviment Friûl al considere fondamentâl pe formazion identitarie, pe formazion civîl e pe formazion professionâl la scuele, e in primis la scuele publiche, che e à di restâ la base e il model di formazion primari.
I insegnants dal Friûl a àn di sei preparâts e incentivâts a formâ i students tai valôr civics, identitaris e professionâi cun cors di istruzion e iniziativis promovudis de Regjon in cunvigne cu la Universitât dal Friûl.
La pratiche dal plurilinguisim cu lis lenghis di minorance e lis grandis lenghis europeanis e à di sei il principi educatîf e didatic di ogni nivel e grât de scuele in Friûl.
Il Moviment Friûl al vûl une Universitât dal Friûl virtuose e autonome, fedêl ae reson storiche che e je stade domandade dai furlans e istituide, al servizi de societât furlane in ogni direzion de culture e de cognossince sientifiche e a sosten de ricercje par une lenghe furlane atuâl e vive.
Al concepìs formis di colaborazion aministrative e sientifiche cun altris universitâts de Slovenie, de Carinzie e talianis tal rispiet de autonomie di ognidune.

10. LA CUISTION DAL COST DE POLITICHE
Il Moviment Friûl al vûl che il cost pal funzionament politic des istituzions di ogni nivel al torni a sei chel just e nuie di plui di chel che al è indispensabil a chest fin, che la ativitât politiche dai elets e sei sostignude de Regjon dome par chês formis che a jentrin intun protocol specific e ben definît, che ogni spese sostignude e sei justificade e controlade di istitûts di control indipendents, che i lôr stipendis parie cu lis spesis e lis indenitâts a sein ridusûts intai limits che a puedin sein acetâts de sensibilitât comune dai eletôrs e justificâts denant di lôr. Chest, par che ce che cumò al va sore chei limits al puedi sei destinât a realizâ i programs politics che cun chei i partîts si son presentâts aes elezions e a àn ricevût il mandât eletorâl.

Il Moviment Friûl al intint che e sei combatude ogni forme di coruzion publiche e privade, cui mieçs che a coventin, e al intint che la istituzion regjonâl tal so complès e sei in prime file par iniziativis in cheste direzion.