Storie dal MF

in sintesi

Il Moviment Friûl al nassè tant che formazion politiche autonomiste pe tutele dai dirits dai Furlans e la rinassite economiche, sociâl e culturâl dal Friûl ai 15 di Zenâr dal an 1966. Lu fondarin Raffaele Carrozzo, nassûte a Cjasarse, Corât Cecot (Corrado Cecotto) nassût a Buie, Arnalt Cincot (Arnaldo Cincotti)  nassût a Udin, Adalbert D’Atri (Adalberto D’Atri), nassût a Vicenze, Vincenzo Ilardi, nassût a Ramaca, Pieri Denêl Menis (Pierdaniele Menis), nassût a Circhina, Artûr Toso (Arturo Toso), nassût a Udin, Etelrêt Pascul (Etelredo Pascolo), nassût a Basilian, Adriane Dainotto (Adriana Dainotto), nassude a Triest, Renât Scarpe (Renato Scarpa), nassût a Vignesie,  Zorç Jus (Giorgio Jus), nassût a Sant Vît, Francesc Placerean (Francesco Placereani), nassût a Montenars, Renç Blasiç (Renzo Biasizzo), nassût a Udin. La costituzion dal Moviment al fo la rispueste aes grandis manifestazions dai students furlans par che e fos istituide la facoltât di Medisine a Udin e la Universitât dal Friûl che e jerin stadis tal Novembar e tal Dicembar 1965.

Il Moviment Friûl al incuintrà une entusiastiche adesion di popul, ma la sô organizazion e struturazion interne a jerin aprossimativis, fin che nol fo elet president l’inz. Fausto Schiavi di Pontebe, che i de la configurazion di partît par menâlu aes elezions regjonâls dal 1968.
La concuiste di 38.989 vôts, che a jerin il 5,08% te distribuzion dai vôts tra dutis lis fuarcis politichis, e la assegnazions consecuente di trê conseîrs regjonâi, a forin un sucès e une afermazion dal Mf, consideradis lis cundizions dificilis di azion di un partît autonomist ta chei agns, che a jerin chei dal control teritoriâl di Gladio.

Il partît si caraterizave par un program autonomist, che al veve tant che obietîfs primaris la istituzion de Regjon Friûl e de Regjon Triest separadis, stant che al considerave che l’inseriment di Triest cul Friûl e fos une anomalie nazionalistiche che e determinave la subordenazion dai interès de Patrie dal Friûl a chei di Triest, che a jerin di nature diferente; la lote cuintri la emigrazion furlane e pal svilup economic de tiere furlane; la lote cuintri la meridionalizazion dai uficis publics e la emargjinazion dai furlans in chei uficis; la lote cuintri lis sclavitûts militârs sul teritori furlan che no permetevin il so svilup economic; la istituzion de Universitât dal Friûl. Nol veve tai siei obietîfs programatics dal 1968 la tutele e la valorizazion de lenghe furlane, come che Fausto Schiavi al varès volût che al fos stât, pe contrarietât e la incomprension di une part dai siei dirigjents di chê volte. Chei obietîfs a deventarin primaris e fondamentâi cu la gnove gjenerazion di autonomiscj che a vuidarin il Moviment Friûl daspò de muart di Schiavi sucedude tal 1972.

In fuarce de sô pression politiche tes istituzions e tes placis dal Friûl (l’Mf nol molà mai di esprimisi cu la sô anime movimentiste) al menà la politiche regjonâl a realizâ cualchidun dai ponts dal so program. La sô fuarce e steve te pôre des fuarcis politichis di maiorance di pierdi consens a so favôr, e cussì la sô presince e fo determinante par realizâ une ricostruzion dal Friûl daspò dal taramot dal 1976 che no cjapàs la forme de distruzion des comunitâts di paîs. La stesse Universitât dal Friûl e fo istituide intal contest de ricostruzion dal taramot. Nol rivà a otignî la Regjon Friûl separade di Triest, e lis leçs di tutele de lenghe furlane che al veve elaboradis e proponudis ae atenzion popolâr e politiche furlane a forin aprovadis te seconde metât dai agns 90, cuant che al veve za decidût il so ritîr de politiche direte e ative tal 1992.

Intor de metât dai agns 80 a nasserin espression autonomistis plui o mancul organizadis che no acetavin di esprimi i stes obietîfs e i stes intindiments dal Moviment Friûl le logjiche di une fuarce politiche struturade e caraterizade di une dissipline di partît, cuntune dialetiche interne ma cuntune sole proiezion di azion sul esterni, come che lu vevin concepît i siei fondadôrs tai agns 60. Traviers stampe e radio a determinarin par induzion un crisi interne tai stes agns che il moviment ambientalist si proponeve cun fuarce e al racueieve consens in ogni direzion. Tes elezions regjonâl dal 1988 l’Mf al realizà dome 14.144 vôts, l’1,7 % de distribuzion eletorâl. Il disorientament che e ‘ndi vignì fûr al menà a une tâl crisi des relazions internis che il partît si spacà in doi e, pûr continuant la sô azion in Regjon cul sôl conseîr regjonâl che al veve, al decidè il so ritîr tal 1992.

Il ritîr tal 1992 al fo une sospension de politiche ative e direte, e no une sieradure, cul afidament de custodie dal partît a un Comitât dai garants, in spiete di verificâ ce e trop dal so program storic i autonomiscj che i vevin fate oposizion a varessin savût reclamâ e realizâ. Si è verificât che chei autonomiscj in 20 agns no àn dimostrade ni la capacitât di azion, ni di organizazion, ni la coerence di program inte direzion autonomiste che a forin dal Moviment Friûl.