Nol jere, come so pari Gjino, de prime gjenerazion dai nestris.
Nol jere de seconde gjenerazion dai nestris.
Al fo in liste cul Moviment Friûl tal 1990.
Albert di Cjaurià nus rivà
cuant che la nestre gjenerazion e jere par ritirâsi
e il Moviment Friûl si metè in spiete di chel moment che nol è mai plui tornât.
Al sarès stât al voleve sei
la nestre tierce gjenerazion, se al fos tornât.
Si spindè pe nestre cause,
pal Friûl e pal Moviment Friûl
publicist di pene feconde,
nus sburtave noaltris, che no crodevin che e fos plui une pussibilitât realistiche,
a tornâ a resurî il nestri simbul, a proponilu a imponilu ae politiche
cun inistence par agns
prin che al deventàs dome une memorie.
A vevin disponût di no lassânus plui tornâ.
Nus fermarin tal 2003.
Al de dongje cun pazience mostre il plui grant dossier documentari di candidaturis ilegâls di chês elezions
di chei che lis vincerin.
E i tribunâi si voltarin di chê altre bande, par no viodi.
Lu denunciarin lui e Marc De Agostini, e lui lu condanarin ancje,
par vê olsât dî e scrivi che i mandants de incurie burocratiche
che e fermave chel dossier cun pretest
intes massimis autoritâts de Regjon si veve di cirîju.
Lu condanarin a cuatri agns di preson.
Lu arestarin tal 2013, ae vilie des elezions, prin che o concludessin
l’ultin tentatîf di partecipâlis
lui che al voleve partecipâlis e cun noaltris al veve inviade la campagne di informazion.
Il Moviment Friûl al faseve ancjemò pôre.
A cjatarin cheste maniere di fermânus.
Albert di Cjaurià al paià par cheste nestre cause.
La malatie e fasè il rest.