Tomasin di Cerclarie al scrîf, ai 11 di Fevrâr 2013 :

Buinesere. Tant che vieli (si fâs par mût di dî) eletôr dal MF mi dûl il cûr a viodi la fature che i orghins dal moviment a fasin par tirâ sù adesions pes elezions regjonâls di Avrîl. Nocate chest, però, mi domandi (e compagn di me tancj, ma tancj, ma tancj altris): cemût mai, a la vilie des votazions, i grups autonomiscj/indipendentiscj furlans no àno rivât a cjatâsi dacuardi almancul su alc, no dîs dut ma almancul ALC?! Par UNE volte UNE, isal mai pussibil che no si rivedi a dâsi dongje suntun program di fonde che al vadi ben par ducj e no lâ a presentâsi, di ben che e vadi, a lis votazions sparniçâts e dividûts tant che chês trê ocjutis che o savìn ce fin che a àn fat cul lôf? I partîts talians (i lôfs), cetant plui grancj, a àn ancje lôr lis corints internis; e duncje, no isal miôr vê des corints (internis) ma presentâsi e, soredut, batisi unîts che no lâ indevant treolant ognidun par cont so e cjapâ sù “un tu, un jo e un il mus”. O varès gust di vê une rispueste di chei che a direzin i “NESTRIS” Moviments. Daspò, al po ancje stâi che, par amôr di Patrie, mi metedi in note ancje jo. Mandi e ogni ben .

Marc De Agostini, segretari dal MF, al rispuint:

Jo o ribalti la cuistion: a son i furlans che a fasin fature a tirâ fûr l’orgoi de lôr identitât al pont di cunvincisi a spindisi in prime persone a pro de autonomie e dal Friûl. A preferissin di delegâ atris cu la riserve … di criticâ in ogni câs daspò des elezions! Par chel che al riguarde “il no dâsi dongje” o pues sigurâ cence teme di smentide che chest nol po jessi rimproverât al Moviment Friûl, tant al è vêr che “la operazion servizi” che o vin inviade che a son za tantis setemanis indaûr e je viarte a ducj. Atris (grups autonomiscj/ indipendentiscj) a àn sielt di bati atris stradis e di preferî atris interlocutôrs, ancje … cuintri nature! Il principi dal “marciare separati per colpire uniti”, no ur jentre; o magari no ur conven a titul personâl. Noaltris o sin ca, come che o jerin une volte. O pensi di vê dite dut.